Hemopiliya குருதி உறையாமை என்றால் என்ன,
  • Hemopiliya குருதி உறையாமை என்றால் என்ன,

    குருதி உறையாமை என்ற பரம்பரைக் கோளாறினால் காயம் அல்லது அறுவை மருத்துவத்துக்குப் பின் வெகு நேரத்திற்கு இரத்தம் கசிந்து கொண்டு இருக்கும். காயத்துக்குப் பின் அல்லது காயம் ஏற்படாமலேயே மூட்டுகளில் வலியோடு கூடிய வீக்கம் இருக்கும். (பரம்பரைக் கோளாறு என்பது மரபணு மூலமாகப் பெற்றோரிடம் இருந்து பிள்ளைகளுக்கு நோய் கடத்தப்படுதல்)

    காரணம் என்ன?

    உறைதல் காரணியின் குறைபாடே குருதி உறையாமைக்குக் காரணம். இதனால் இரத்தம் வடிதல் அதிகரிக்கிறது. இதில் இரு வகைகள் உண்டு: குருதியுறையாமை நோய்- A (உறைதல் காரணி VIII குறைபாடு). இது பரவலாகக் காணப்படுவது. 5000-ல் ஒரு பிறப்பில் இது இருக்கும். குருதியுறையாமை நோய்- B (காரணி IX குறைபாடு). இது பரவலாகக் காணப்படுவதில்லை. 20000-ல் ஒரு பிறப்பில் இருக்கும்.

    பரம்பரையாக எவ்வாறு கடத்தப்படுகிறது?

    குருதியுறையாமை நோய் X இணைப்பு கொண்டது. தாயிடம் இருந்தே பெறப்படுகிறது. இருப்பினும் இந்நோய் ஆண்களிடம் உள்ளது. தாய் மாமன்கள் அல்லது தாய்க்கு உறவுமுறையான ஆண்களில் பெரும்பாலும் நோய் இருப்பதை குடும்ப மருத்துவ வரலாறு காட்டுகிறது. பல நோயாளிகளின் மரபணுக்களில் புதிய பெறப்பட்ட பிறழ்வுகள் (new acquired mutation) காணப்படுகின்றன. இக் குடும்பங்களில் நோயின் குடும்ப வரலாறு இருப்பதில்லை.

    குருதி உறையாமை நோயின் X- இணைப்பு வகையில் பரம்பரைக் கடத்தலுக்கு X குரோமோசோமில் உள்ள ஒரு குறைபாடுள்ள மரபணுவே காரணம். எல்லா மனிதர்களுக்கும் X குரோமோசோம்கள் உண்டு. பெண்களுக்கு இரண்டு X குரோமோசோம்களும் ஆண்களுக்கு ஒரு X-ம் ஒரு Y குரோமோசோமும் இருக்கும். X குரோமோசோமே குருதியுறையாமை நோய்க்கான மரபணுவை எடுத்துச் செல்கிறது. தனது X குரோமோசோமில் குருதியுறையாமை மரபணுவை மரபு வழியில் பெற்றுக் கொள்ளும் ஓர் ஆண் குருதியுறையாமை நோயால் துன்புறுவார். ஒரு பெண்ணின் ஒரு X குரோமோசோமில் குறைபாடுள்ள மரபணு இடம் பெற்றால் அவர் “குருதியுறையாமைநோயை எடுத்துச்செல்பவர்” ஆவார். எடுத்துச் செல்பவர் குருதியுறையாமை நோயால் துன்புற மாட்டார். ஆனால் அவர் அந்த நோயைத் தன் மகன்களுக்குக் கொடுக்கலாம். அவர்களது பெண் குழந்தைகளுக்கு இந்நோய் இருக்காது. ஆனால் அவர்களும் எடுத்துச்செல்பவர்களாக இருக்கலாம். ஏற்கெனவே கூறியது போல குருதியுறையாமை குடும்பநோயாக இல்லாத குடும்பங்களிலும் இது புதிய பிறழ்வாக உண்டாகக் கூடும்.

    குருதியுறையாமையால் ஏற்படுவது என்ன?

    குருதி உறையாமை நோயுள்ளவர்களுக்குக் காயம், மருந்தூசி, அறுவை மருத்துவம், பல்பிடுங்குதல் ஆகியவற்றின் போது நீண்ட நேரத்திற்கு இரத்தம் வடிந்து கொண்டே இருக்கும். இவர்களுக்கு உடலின் உள்ளும், முழங்கால், முழங்கை, கணுக்கால் மூட்டுகளிலும் இரத்தம் கசியும். இத்தகைய இரத்தக் கசிவு மூட்டுகளைச் சேதப்படுத்தும். தலை, வயிறு போன்ற இரத்த உட்கசிவு உயிருக்கு ஆபத்தானது.

    குருதியுறையாமை நோயாளிகளுக்கு காயம்பட்டு வெகு நேரத்திற்கு இரத்தக் கசிவு இருக்கும். மேலும் நேரங்கழித்து இரத்தம் கசியும்: எடுத்துக்காட்டாக பல்பிடுங்கி அல்லது விபத்து காயம் ஏற்பட்டு பலநாள் கழித்து. கடுமையான குருதி உறையாமை நோயுள்ளவர்களுக்கு காயங்கள் இன்றியும் தானாகவே இரத்தக் கசிவு ஏற்படுவதுண்டு.

    குருதி உறையாமை நோயில் பலவகைகள் உண்டா?

    இரண்டு முக்கிய வகை குருதியுறையாமை நோயுண்டு: அவை குருதியுறையாமை நோய் A யும் B யும்.

    குருதியுறையாமை நோய் A உள்ளவர்களுக்குக் காரணி VIII அளவு குறைவாகவும், குருதியுறையாமை நோய் B உள்ளவர்களுக்குக் காரணி IX அளவு குறைவாகவும் இருக்கும். நோயாளிகளுக்குக் காரணி VIII அல்லது IX ஊசி மருந்துகளால் சிகிச்சை அளிக்க இது முக்கியமானதாகும். எனவே ஊசி மருந்தைத் தேர்ந்தெடுக்க இவற்றில் எந்த காரணி குறைவாக இருக்கிறது என்பதை அறிவது முக்கியமானதாகும்.

    கடுமையின் அளவில் வேறுபாடுகள் இருக்கின்றனவா?

    ஆம், காரணியின் அடிப்படை அளவைக் கொண்டே (மருத்துவம் அளிக்காமல்) ஒரு நோயாளியின் நோய்க்கடுமை அளவைத் தரவரிசைப்படுத்தலாம். ஒவ்வொரு நோயாளிக்கும் ஒரு குறிப்பிட்ட அளவுநிலை உண்டு. அவரது குடும்ப உறுப்பினர்களுக்கும் இந்நோய் இருந்தால் அவர்களூக்கு வெவ்வேறு அளவுநிலை இருக்கும். இரத்தத்தில் உள்ள காரணியின் அளவுநிலையைப் பொறுத்து நோயாளிகள் தரவரிசைப்படுத்தப் படுவர். இயல்பு நிலையை விட குறைபாடு மிக அதிகமாக இருப்பதால் அளவுநிலை குறைவாக இருந்தால் நோய் கடுமையாக இருக்கிறது என்று அர்த்தம். இரத்தத்தில் 1%-ஐ விட குறைவாகக் காரணியின் அளவுநிலையைக் கொண்ட கடுமையான குருதியுறையா நோயாளிகளுக்குக் காயம் ஏற்படாமல் தானாகவே குருதிக் கசிவு உண்டாகும். அதே சமயத்தில் 5% காரணி அளவுநிலை யுள்ள மித நோயாளிகளுக்குக் காயம் ஏற்பட்டாலோ அல்லது அறுவை மருத்துவத்திற்குப் பின்னரோ இரத்தக் கசிவு இருக்கும்.

    இரத்தத்தில் இருக்கும் காரணி அளவைப் பொறுத்தே குருதியுறையா நோய் A அல்லது B யின் நோய்க்கடுமை இருக்கும்

    கடுமையான குருதியுறையா நோயாளிகளுக்கு 1 % -ஐ விட குறைவாக VIII அல்லது IX காரணி இருக்கும்

    மிதமான குருதியுறையா நோயாளிகளுக்கு  1-5%  VIII அல்லது  IX காரணி இருக்கும்.

    இலேசான குருதியுறையா நோயாளிகளுக்கு  5 – 40%  VIII அல்லது IX காரணி இருக்கும்.


    குருதி கசியும் சில முக்கிய இடங்கள்

    இடுப்புத் தசை ஒரு முக்கியமான குருதி கசியும் இடமாகும். இவ்விடத்தில் இரத்தம் கசிந்தால் பொதுவாக வயிற்றில் வலி இருக்கும். இத் தசை உடலில் ஆழமாக இருப்பதால் வீக்கம் வெளியே தென்படுவதில்லை. இதனை ஒரு மருத்துவரே கண்டறிய முடியும். முழங்கால், முழங்கை, கணுக்கால் ஆகிய முக்கியமான மூட்டுகளே பிற இரத்தம் கசியும் இடங்கள். உடலின் எப்பகுதியில் காயங்கள் இருந்தாலும் பாதிப்பு ஏற்படும். சிறு காயம் ஏற்பட்டாலும் சில நோயாளிகளுக்கு மூளையில் இரத்தக் கசிவு ஏற்படலாம். நோயாளிகளுக்கு எப்போதாவது சிறுநீரிலும் இரத்தம் வெளியேறலாம்.

    குருதியுறையா நோய் எவ்வாறு கண்டறியப்படுகிறது?

    குருதியுறையா நோயைக் கண்டறிய மருத்துவர் நோயாளியிடம் அவரது குருதிக்கசிவின் வரலாற்றையும், குடும்பத்தில் வேறு யாருக்காவது இருந்ததுண்டா என்ற வரலாற்றையும் கேட்டறிவார். இதன் மூலம் உங்களுக்கோ அல்லது உங்கள் குடும்ப உறுப்பினர்களுக்கோ குருதி கசிவு பிரச்சினை இருக்கிறதா என்பது தெரியவரும். இருப்பினும் குருதியுறையாமை நோயுள்ள சில குடும்பங்களுக்கு இந்நோயின் குடும்ப வரலாறும் உள்ளது. மூட்டுகளின் நிலை பற்றி மருத்துவர் சோதிப்பார். பின் குருதியுறையாமையைக் கண்டறிய சிறப்பு இரத்தப் பரிசோதனை நடத்தப்படும். இப்பரிசோதனை வசதி எல்லா இடங்களிலும் இருப்பதில்லை. இச்சோதனையில் அடிப்படையான ஒரு பொதுப்பரிசோதனை அடங்கும். இதில் இரத்தம் உறைய எடுத்துக்கொள்ளும் நேரம் கணக்கிடப்படுகிறது (PT, APTT). குருதியுறையாமை நோயில் காணப்படுவது போல் APTT அதிகமானால் ஒரு சிறப்புச் சோதனை மூலம் காரணிகள் VIII அல்லது IX ஆகியவற்றின் குறைபாடும், அவற்றின் அளவுகளும் கண்டறியப்படும். இச்சோதனை குருதியுறைவு நோய் இருப்பதையும், வகை என்ன என்பதையும் (A அல்லது B), நோயின் கடுமையையும் வெளிப்படுத்துகிறது. இவ்விவரங்கள் எல்லாம் கிடைத்த பின்னர் செய்ய வேண்டிய மருத்துவம், பின்பற்றவேண்டியவைகள் ஆகியவற்றைக் குறித்து மருத்துவர் உங்களுக்கு ஆலோசனை கூறுவார்.

    கடுமையான குருதியுறையாமை நோய் குழந்தைகளுக்குக் கூட மோசமான குருதிக்கசிவு பிரச்சினைகளை ஏற்படுத்தும். பொதுவாக குழந்தைகளுக்கு இருக்கும் கடுமையான குருதியுறையாமை நோய் முதல் ஆண்டிலேயே கண்டறியப்படுகிறது. இலேசான குருதியுறையாமை நோயை வயதாகும் வரையில் அல்லது பெரிய காயம் ஏற்படும் வரையில் அல்லது அறுவைமருத்துவம் செய்யும் வரையில் கண்டறிய முடிவதில்லை. இரத்தக் கசிவு பிரச்சினை குருதியுறையாமை நோய் A, B இரண்டிற்கும் ஒரேமாதிரியாகவே இருக்கும். சிறப்பு இரத்த பரிசோதனை மூலமே வகையைக் கண்டறிய முடியும். மருத்துவம் (ஊசி மருந்துகள்) வெவேறானதால் வகையைக் கண்டறிவது முக்கியமே.

    குருதியுறையாமை நோய்க்கு எவ்வாறு மருத்துவம் அளிக்கப்படுகிறது? காரணி மாற்று சிகிச்சை

    குருதியுறையாமை நோய்க்கு அளிக்கப்படும் முக்கிய மருத்துவம் காரணி மாற்று சிகிச்சை என்று அழைக்கப்படுகிறது. குறைபடும் காரணி, உறைதல் காரணி VIII (குருதியுறையாமை நோய் A-க்கு) மற்றும் உறைதல் காரணி IX (குருதியுறையாமை நோய் B-க்கு) ஆகியவற்றின் செறிவால் மாற்றப்படுகிறது. இக்காரணிகள் கொடையாளிகளின் குருதி நீரில் இருந்து சேகரிக்கப்பட்டு பின் சுத்தமாக்கப்படுகிறது (பிளாஸ்மாவில் இருந்து பெறப்பட்டது). அல்லது அவற்றை ஆய்வகத்திலும் செயற்கையாக உருவாக்கலாம் (மறுசேர்க்கைப் பொருள்). இவை நரம்பு மூலமாக நோயாளியின் இரத்தத்திற்குள் செலுத்தப்படுகிறது.

    குருதி நீரில் இருந்து பெறப்பட்டு சுத்திகரிக்கப்பட்ட உறைதல் காரணிச் செறிவுகள் மனித இரத்தத்தில் இருந்து உருவாக்கப்படுகின்றன. கல்லீரல் அழற்சி, எச்.ஐ.வி. போன்ற நோய்கள் பரவாமல் தடுக்க முதலில் இரத்தம் தூய்மை செய்யப்படுகிறது. தானம் அளிக்கப்பட்ட இரத்தம் தற்கால முறைப்படி சோதிக்கப்பட்டு தூய்மைப்படுத்தப் படுவதால் மனித இரத்த உறைவுக் காரணிகள் மூலம் தொற்று நோய் பரவும் ஆபத்து மிகக் குறைவாகும். புதிதாகக் கண்டுபிடிக்கப்பட்டுள்ள பொருள் மறுசேர்க்கை உறைதல் காரணிகள் என்று அழைக்கபடுகின்றன. அவை மனித இரத்தத்தில் இருந்து உருவாக்கப்படவில்லை. மாறாக ஆய்வகத்தில் உருவாக்கப்படுவதால் கல்லீரல் அல்லது எச்.ஐ.வி. நோய் பரவும் ஆபத்தில்லை.

    உறைதல் காரணிகள் புட்டிகளில் கிடைக்கின்றன. இவை கலக்கப்பட்டு நரம்பு மூலமாக 15 நிமிடங்களுக்கு மேல் அளிக்கப்படுகின்றன. மிகச் சிறிய குழந்தைகளுக்கு நரம்பு மூலம் அளிக்க ஓர் அமைப்பு பயன்படுத்தப்படுகிறது. பெரிய குழந்தைகளுக்கு நேரடியாக நரம்பு மூலம் அளிக்கப்படும். அளவு, குழந்தையின் எடையோடு தொடர்புடையது. குழந்தைகள் வளர வளர கொடுக்கப்படும் காரணியின் அளவு கூடுதலாகத் தேவைப்படும். மேலும் அது இரத்தக் கசிவின் கடுமையைப் பொறுத்துள்ளது. இலேசான காயத்திற்கு ஒன்று அல்லது இரண்டு நாட்களுக்கு குறைந்த அளவு (உ-ம். 20 %) காரணியே தேவைப்படும். ஆனால் கடுமையான காயத்திற்கு (உ.ம். மூளைக் காயம் அல்லது பெரிய அறுவை சிகிச்சை) 7 நாட்களுக்கு  100 % திருத்தம் தேவைப்படும்.

    காரணி VIII அளவு கணக்கீடு

    தேவைப்படும் திருத்த அளவு X எடை கிலோகிராம்கள்/2 =  மருந்தூசிக்கு i.u (அலகுகள்) காரணி

    காரணி IX  அளவு கணக்கீடு

    தேவைப்படும் திருத்த அளவு X எடை கிலோகிராம்கள் = மருந்தூசிக்கு i.u (அலகுகள்) காரணி

    மாற்று சிகிச்சை முறைகள்- தேவைக்கேற்ப அளித்தல் மற்றும் நோய்தடுப்பு முறை

    பழைய காரணி மாற்று சிகிச்சை முறை ‘தேவைக்கேற்ப அளித்தல்’ என்று அழைக்கப்பட்டது. ஒரு நோயாளி மூட்டு வீக்கத்தாலோ அல்லது காயத்தோலோ துன்புறும்போது, பிரச்சினைக்குப் பின் காரணி மருந்தூசி மூலம் தரப்படுகிறது. குருதியுறையா நோய் வகை A அல்லது  B, காயத்தின் தன்மை, குழந்தையின் எடை ஆகியவற்றைப் பொறுத்து மாற்றின் வகை முடிவு செய்யப்பட்டது. இது ஒரு சூத்திரத்தால் மருத்துவரால் கணக்கிடப்பட்டது. நோயாளிகளுக்குப் பல காப்பு முறைகள் கூறப்பட்டன. குழந்தைகள் விளையாட்டில் கட்டுப்படுகள் விதிக்கப்பட்டன. உ-ம்: தொட்டு விளையாடக் கூடாது, காயம் ஏற்படுவதைத் தடுத்தல், சதைக்குள் மருந்தூசி, உடம்புபிடித்தல் போன்றவை.

    இருப்பினும், கவனமாகக் கவனித்துக் கொள்ளப்படும் நோயாளிகளுக்கும், பல வேளைகளில் நேரம் தவறி மருந்தூசி அளித்தலும் மூட்டுகளில் திரும்பத் திரும்ப இரத்தம் கசிதலும் மூட்டுகளில் சிதைவை ஏற்படுத்தலாம். பொதுவாக இச்சிதைவுகள் நிரந்தரமான குறைபாடுகள் அல்லது ஊனத்திற்கு வழிகோலும். பிற்காலத்தில் குருதியுறையா நோயாளிகள் பலருக்கு சிதைவுற்ற மூட்டுகளுக்காக மூட்டு மாற்று அறுவை மருத்துவம் தேவைப்படும்; அல்லது அவர்கள் ஊனமடைய நேரிடலாம்.

    சிறந்த முறையிலான மருத்துவம் தடுப்புமுறை என்று அழைக்கப்படுகிறது. இதில் மூட்டில் இரத்தக் கசிவு ஏற்படும் முன்னரே நோயாளிக்கு முறையாகத் தொடர்ந்து சிறு சிறு அளவில் காரணி கொடுக்கப்படுகிறது. குழந்தைப் பருவத்திலேயே, முக்கியமான மூட்டுகள் அல்லது குறியிலக்கு மூட்டுகளில் இரத்தக் கசிவு ஏற்படும் முன்னர் இவ்வாறு செய்தால் அது பிரதம நோய்த்தடுப்புமுறை என்று அழைக்கப்படுகிறது. வயதான நோயாளிகளுக்கு ஒரு பெரிய பிரச்சினை வந்து மேலும் பிரச்சினைகள் வராமல் அதைத் தடுப்பதற்குக் கொடுக்கப்படுமானால் அது இரண்டாம்பட்ச தடுப்புமுறை என்று அழைக்கப்படுகிறது. தேவைக்கேற்றபடி அளித்தல் முறையில் அதிக அளவு காரணி தேவைப்படுவதால் அதில் செலவு அதிகம்.  இருப்பினும் பின்னர் மருத்துவர்கள் பாதிக்கப்பட்ட மூட்டை மதிப்பிட்டு நோக்கும்போதும், நோயாளியின் நோக்குநிலையின் படியும் சிகிச்சையின் இறுதி பலன் அதிகமே. மேலும் அதிகக் கட்டுப்பாடும் அச்சமும் இல்லாமல் குழந்தையால் ஒரு செயல் திறமிக்க வாழ்க்கையை நடத்த முடியும். ஆனாலும் கடும் காயங்களைத் தவிர்க்க முயலவும்.

    மாற்று சிகிச்சையின் சிக்கல்கள்

    காரணி மாற்று சிகிச்சையே குருதியுறையாமை நோய்க்கு உரிய சிகிச்சை என்றாலும் அதில் சிக்கல்கள் உள்ளன. முன்னர் கல்லீரல் அழற்சி B, C, எச்.ஐ.வி. போன்ற வைரல் தொற்றுக்களே ஆபத்தாக இருந்தன. இருப்பினும் தற்போதுள்ள சிறந்த தூய்மை மற்றும் பாதுகாப்பு நடவடிக்கைகளால் குருதி நீரில் இருந்து பெறப்படும் காரணியில் இவை குறைக்கப்பட்டுள்ளன. மேலும் மறுசேர்ப்புப்பொருள் காரணியில் இவை முற்றிலுல் இல்லை. தற்போது இரத்த தானம் வழங்குவோர் நன்கு பரிசோதிக்கப்பட்டும், தானம் பெறப்பட்ட இரத்தப் பொருட்கள் சிறந்த முறையில் சோதிக்கப் பட்டும், குருதி நீரில் இருந்து பெறப்படும் காரணி உற்பத்தி முறைப்படுத்தப் பட்டுள்ளது. குருதி நீர் சேகரிக்கப்பட்ட பின் கிருமி கொல்லிகளாலும் வெப்பத்தாலும் தூய்மைப்படுத்தப்பட்டு வைரசுகள் அழிக்கப்படுகின்றன.

    மூட்டுகளுக்குள் இரத்தக் கசிவு இருந்தால் மூட்டுகள் சிதைவுற்று குறைபாடுகளும் ஊனமும் ஏற்பட வழிவகுக்கும். ஒரு மூட்டு எத்தனை தடவை பாதிக்கப்படுகிறதோ அவ்வளவுக்கு அவ்வளவு அது நிரந்தரமாகப் பாதிக்கப்பட வாய்ப்புள்ளது. பொதுவாக பாதிக்கப்படும் மூட்டுகள் முழங்கை, முழங்கால் அல்லது கணுக்கால் மூட்டுக்களே. மருத்துவம் செய்ய நாட்கடத்துவதாலும் சரியான பலன் கிடைப்பதில்லை. மூட்டுகளில் ஒரு முறை பாதிப்பு ஏற்பட்டுவிட்டால் வலியினாலும், இயங்க முடியாமையாலும் இயக்கம் பாதிக்கப்படும். இதனால் தசைகள் பலவீனமாகி வீணாகிவிடவும் வாய்ப்புண்டு. இது கீழே விழுந்து காயம் ஏற்பட வழிவகுக்கும்.

    தடுப்பான்கள் உருவாவதே இன்னொரு ஆபத்தாகும். உறைதல் காரணிகளின் பெரும் குறைபாடு உள்ள நோயாளிகளுக்குக் காரணி மாற்று சிகிச்சை செய்யும்போது இத்தகைய எதிர்பொருடகள் எப்போதாவது உண்டாகலாம். ஒரு தடுப்பான் கணக்கீடு மூலம் இத்தகைய எதிர்பொருட்களை அளவிட முடியும். உறைதல் காரணிகள் செயல் படும் முன்னரே தடுப்பான்கள் அவற்றை அழித்து விடுவதால், உறைதல் காரணியை நோயாளியின் உடலுக்குள் செலுத்தும் போதே இரத்தக் கசிவு உண்டாவதைக் கொண்டு தடுப்பான்கள் உருவாகிவிட்டதைக் கணித்துவிடலாம். குருதியுறையா நோய் A உள்ள நோயாளிகளில் 20-30 % பேருக்கும்  குருதியுறையா நோய் B நோயாளிகளில் 2-5 % பேருக்கும் இது ஏற்படலாம்.

    தடுப்பான்களுக்கு சிகிச்சை

    இது தடுப்பான்களின் அளவையும் (டைட்டர்) அவை குருதிக்கசிவை உண்டாக்குகின்றனவா இல்லையா என்பதையும் பொறுத்தது. மருத்துவர்கள் அதிக அளவில் உறைவுக் காரணிகளையோ அல்லது வேறு வகையான உறைவுக் காரணி மூலங்களையோ பயன்படுத்தலாம். தடுப்பான்களின் அளவும், குருதிக்கசிவும் அதிகமாக இருந்தால் மருத்துவர்கள் குருதிக்கசிவைக் கட்டுப்படுத்த மாற்று செயல்படுத்திகளையும் (bypassing agents) மறுசேர்க்கைக் காரணி VII-ஐயும் பயன்படுத்தலாம். எதிர்பொருட்களைக் குறைக்க எப்போதாவது வேறு மருந்துகளையும் முயன்று பார்க்கலாம். சிறந்த முறையிலான மருத்துவத்திற்கு உங்கள் மருத்துவரைக் கலந்தாலோசிக்கவும்.

    முன்னெச்சரிக்கைகள்

    முடிந்த வரையில் காயங்களைத் தவிர்க்கவும். குழந்தைகள் கீழே விழாமல் கவனிக்கவும். தசை மருந்தூசிகளைத் தவிர்க்கவும். மெல்லிய ஊசிகளைக் கொண்டு குழந்தைகளுக்கு பல தடுப்பூசிகளைத் தோலில் செலுத்தலாம். அழுத்தமாக உடலைப் பிடிப்பதையும் கடினமான உடற்பயிற்சியையும் குறிப்பாக வலியுள்ள மூட்டுகளில் தவிர்க்க வேண்டும். ஒரு மூட்டில் வலியையோ வீக்கத்தையோ உணர்ந்தால் உடனடியாக மருத்துவரை அணுகவும். அசையாமல், ஐஸ் ஒத்தடம் கொடுக்கவும். மூட்டை உயர்த்தி வைத்த வண்ணம் ஓய்வு எடுக்கவும். மருத்துவரின் ஆலோசனைப்படி உரிய கால அளவுக்கு மருந்துகளை உட்கொள்ளவும்.

    வீட்டு சிகிச்சை

    சில குடும்பங்களால் காரணி மாற்று சிகிச்சையைக், குறிப்பாக வளர்ந்த குழந்தைகளுக்கு வீட்டில் வைத்தே வழங்க முடிகிறது. இதன் மூலம் வீங்கிய மூட்டுகளுக்குத் தகுந்த சிகிச்சையை மருத்துவ மனைக்கு அடிக்கடி செல்லாமலேயே தர முடியும். இது உங்களுக்கு இயலுமா என்று உங்கள் மருத்துவரிடம் கேளுங்கள்.

    இலவசக் காரணி மாற்று சிகிச்சை

    சில மாநிலங்கள் இலவச காரணி மாற்று சிகிச்சை அளிக்கின்றன. அரசு மருத்துவரையும் குருதியுறையா நோயாளிகள் கூட்டமைப்பையும் அணுகவும். அவசர காலங்களில் சில மாநிலங்கள் இலவச காரணியையும் வழங்குகின்றன. எது கிடைக்கிறது என்பதைப் பார்க்கவும். அரசு-மக்கள் பிரதிநிதிகள் மூலம் எல்லா நோயாளிகளுக்கும் காரணி கிடைப்பதை உறுதி செய்யவும். உங்கள் குரலே முக்கியமானது. உங்களால் உங்கள் குடும்பத்திற்கும் பிறருக்கும் உதவ முடியும்.

    எதிர்ஃபைபிரினோலிட்டிக் மருந்துகள் (Antifibrinolytic Medicines)

    மாற்று சிகிச்சையுடன் எதிர்ஃபைபிரினோலிட்டிக் மருந்துகளையும் (டிரானெக்சாமிக் அமிலம், அமினோகேப்ராய்க் அமிலம் போன்றவை) பயன்படுத்தலாம். அவற்றை வாயில் இரத்தம் கசிவது போன்ற சிறு கசிவுகளுக்குத் தனியாகவும் பயன்படுத்தலாம்.

    உடற்பயிற்சி மருத்துவத்தின் பங்கு (Role of physical therapy)

    வலிமையான தசைகள் மூட்டுகளைப் பாதுகாக்க உதவும். எனவே குருதியுறையாமை நோய்க்கு உடற்பயிற்சியும் மருத்துவத்தின் ஓர் அங்கமே. மூட்டு வலியோடு இருந்தால் உடற்பயிற்சி மருத்துவத்தை அல்லது புதிய உடற்பயிற்சி முறைகளைத் தவிர்க்க வேண்டும். இடைவெளி விட்டு அல்லது ஓய்விற்குப் பின் மீண்டும் உடற்பயிற்சி மருத்துவத்தைத் துவங்கினால் கூடுதலாகக் காரணி தேவைப்படும். எல்லாவிதமான உடற்பயிற்சி மருத்துவத்தையும் தேர்ச்சிபெற்ற நிபுணரின் மேற்பார்வையில் உங்கள் மருத்துவரின் வழிகாட்டுதல் படியே மேற்கொள்ள வேண்டும். வலியோ வீக்கமோ இருந்தால் உங்கள் மருத்துவரிடம் மீள்பரிசோதனைக்குச் செல்லவும். உடற்பயிற்சி மருத்துவத்தின் பலன் உடனடியாகத் தெரியாது. ஆனால் அது நீண்ட கால இயக்கத்திற்கு முக்கியமானது.

    மரபணு சிகிச்சை

    ஆராய்ச்சியாளர்கள் குருதியுறையாமை நோய்க்குக் காரணமான மரபணுக்களில் உள்ள குறைபாட்டைக் களையும் வழிகளைக் கண்டுபிடிக்க முயற்சி செய்து வருகின்றனர். குருதியுறையாமை நோய்க்கான மருத்துவமாக ஏற்றுக் கொள்ளும் அளவுக்கு மரபணு சிகிச்சை இன்னும் வளர்ச்சி அடையவில்லை. இருப்பினும் ஆய்வாளர்கள் குருதியுறையாமை நோய் B-க்கான மரபணு ஆய்வகச் சோதனைகளை தொடர்ந்து நடத்தி வருகின்றனர்.

     குறிப்புகள்:

    www.haemophilia.org
    www.haemophilia.in
    www.haemophilia.org

     

  • பகிர்ந்தளிக்க :

தொடர்புடைய செய்திகள்
விளையாட்டு செய்தி
இலங்கை சட்டம்
மங்கையர் பகுதி
மங்கையர் மருத்துவம்
 மரண அறித்தல்
wso shell IndoXploit shell r57 shell hacklink hacklink satış wordpress download Google hacklink